Yasin Mirqasım oğlu Seyidov
baytarlıq üzrə elmlər namizədi, baytar həkim, ömrünün 84-cü ilində vəfat edib.
Yasin Mirqasım oğlu Seyidov 1936-cı ildə Naxçıvan MR, Şərur rayonunun Şahtaxtı kəndində anadan olmuşdur. 1954–1959-cu illərdə Azərbaycan Kənd Təsərrüfatı İnstitutunda “Baytar həkim” ixtisası üzrə təhsil almışdır.
Yasin Seyidov, AKTİ-nin baytarlıq fakültəsini bitirdikdən sonra 1959-1964-cü illərdə Naxçıvanda Y.Cabbarov adına kolxozda baytar həkim kimi işləmişdi. Eyni zamanda 1960-1961-ci illərdə Naxçıvan Rayon Baytarlıq Müalicəxanasında 2-ci baytar həkim, daha sonra baş baytar həkim işləmişdir.
1961-1963-cü illərdə BTS-da “Epizootologiya” şöbəsinin müdiri vəzifəsində, 1965-1966-cı illərdə “Yoluxmayan xəstəliklər” şöbəsinin müdiri vəzifəsində çalışmışdır.
Yasin Seyidov 1966-cı ildə “Naxçıvan MR-da xırda buynuzlu heyvanların helmint və 4 helmintozları” mövzusu üzrə müdafiə etmişdir, baytarlıq elmlər namizədi dərəcəsinə layiq görülmüşdür. 1966-1968-ci illərdə Azərbaycan SSR Kənd Təsərrüfatı Nazirliyinin Baş Baytar İdarəsinin “Helmintologiya ekspedisiyasında” böyük baytar həkim kimi çalışmışdır.
Y.M. Seyidov 1968-1976-cı illərdə Azərbaycan Elmi-Tədqiqat Baytarlıq İnstitutunun “Helmintologiya” şöbəsində baş elmi işçi, 1976-1978-ci illərdə Baş Baytarlıq İdarəsinin Epizootologiya Əleyhinə Ekspedisiyasının rəisi işləmişdi. 1978-1979-cu illərdə Baş Baytarlıq İdarəsinin rəis müavini vəzifəsində çalışmışdır. 1979-1981-ci illərdə Kolxozlar arası Heyvandarlıq Sənaye Respublika Birliyinin sədri, 1981-2000-ci illərdə Bakı Şəhər Baytarlıq Stansiyasının rəisi olmuşdur.
Y.M. Seyidov 2004-cü ildən Azərbaycan Elmi-Tədqiqat Baytarlıq İnstitutunda “Helmintologiya” şöbəsində aparıcı elmi işçi, 2015-ci ildən şöbə müdiri vəzifəsində, 2018-ci ildən həmən şöbədə aparıcı elmi işçi kimi çalışmışdır.
2014-cü ildə Azərbaycan Respublikası Standartlaşdırma Metrologiya və Patent üzrə Dövlət Komitəsi tərəfindən “Psoriazın müalicəsi üçün məlhəm” hazırladığına görə ona Patent verilmişdir. O, bir çox elmi məqalələrin müəllifi, institutun elmi şurasının üzvü olmuşdu. İxtisaslı elmi kadrların hazırlanmasında Yasin müəllimin xidmətləri böyük olmuşdur.
Azərbaycan Kənd Təsərrüfatı Nazirliyi və Baytarlıq Elmi Tədqiqat İnstitutunun rəhbərliyi tərəfindən 2019-cu ildə əmək fəaliyyətinə görə təşəkkürnamə ilə mükafatlandırılmışdır.
Baytarlıq Elmi-Tədqiqat İnstitutunun kollektivi alim Yasin Seyidovun vəfatından kədərləndiyimizi bildirir, mərhumun doğmalarına, əzizlərinə, və dostlarına dərin hüznlə başsağlığı veririk.
