Baytarlıq Elmi-Tədqiqat İnstitutunun Parazitologiya şöbəsinin müdiri biol.ü.f.d., dosent Aygün Əzizova və Abşeron Eksperimental Dayaq Məntəqəsinin müdiri Ramin Məmmədov Abşeron rayonu Yaşma qəsəbəsi “Azər Aqro” qoyunçuluq təsərrüfatında olmuşlar. Mütəxəssislər tərəfindən heyvanlar kliniki baxışdan keçirilmiş, xəstə və qızdırmalı heyvanlardan patoloji materiallar götürülüb müayinə üçün institutun laboratoriyasına gətirilmişdir. Tədqiqat üçün 10 (on) baş müxtəlif qoyun cinslərinə məxsus kal və 10 baş heyvanın periferik qan nümunələri müayinədən keçirilmiş, tələf olmuş 2 baş heyvanın daxili orqanları infeksion xəstəliklərə görə müayinə edilmişdir.
Kal nümunələrinin müayinəsi zamanı nematodlardan Strongylus sp., Nematodirus sp. mono və assosiativ formadayüksək intensivliklə, ibtidailərdən Eimeria sp. müxtəlif nümunələrdə fərqli intensivliklə aşkar edilmişdir. Müalicə məqsədilə hər iki parazitə eyni vaxtda məhvedici təsir göstərən Prima Levo Forte suspenziyasının oral qəbulu tövsiyə edildi (10 kq diri çəkiyə 2,5 qr).
Sağlam heyvanların periferik qan yaxmalarının mikroskopiyasında eritrositlər norma səviyyəsində görünüşə malik izlənildi. Xəstə heyvanların qan yaxmalarının mikroskopiyasında eritrositlər dağılmış vəziyyətdə müşahidə edildi. Heyvanda patoloji proses izlənilsə də eritrositlərdə qan-parazitar törədiciləri qeyd edilmədi.
Cəsədlərin parenximatoz orqanlarından (qaraciyər, dalaq, böyrək, ağciyər, ürək, sümük iliyindən) yaxmalar hazırlanaraq mikroskopiya edildi. Mikroskopiya zamanı yaxmalarda Clostridium perfringens, Pasteurella multocida, E.coli bakteriyaları aşkarlandı. Bu isə heyvanlarda pasterellyoz və enterotoksimiya xəstəliklərinin mövcudluğunu təsdiq edir. Xəstəliklərə qarşı təlimata müvafiq Kənd təsərrüfatı heyvanlarının infeksion xəstəliklər şöbəsinin müdiri tərəfindən müalicə sxemi tövsiyə edildi.