11 iyul 2024-cü il tarixində Baytarlıq Elmi-Tədqiqat İnstitutunun Parazitologiya şöbəsinin müdiri Aygün Əzizova, şöbənin baş elmi işçisi Mahir Nəsibov, böyük elmi işçi Gülər Məmmədova Xaçmaz rayonu Xuray kəndində yetişdirilən keçi təsərrüfatında qan-parazitar xəstəliklərinə görə monitorinq keçirmişlər. Təsərrüfatda qızdırmadan tələf olmuş çəpişlərin patoloji-anatomik yarma müayinələri aparılmış, digər diri xəstəliyə şübhəli heyvanlardan periferik qan yaxma nümunələri götürülmüşdür. Təsərrüfatda qızdırma xəstəliklərinin mütəmadi müşahidə edilməsini nəzərə alıb heyvanların otarıldığı otlaqlarda piroplazmidlərin aralıq sahibləri olan gənələrin intensivlik səviyyəsini dəyərləndirmək üçün torpaq nümunələri götürülmüşdür. Həmçinin, heyvanların üzərində parazitlik edən gənələrin və onların daşıdıqları törədicilərin növ təkibini təyin etmək üçün gənələr toplanılmışdır. Qızdırmalı heyvanlarda helmintoz və ibtidai bağırsaq parazitlərinin törətdiyi eymerioz xəstəliyini və assosiativ invaziyanı müəyyən etmək üçün koproloji nümunələr götürülmüşdür. Parazitologiya şöbəsində aparılmış müayinə işlərinin nəticələrinə görə heyvanlarda büruzə verən qan-parazitar xəstəliyinin babezioz olduğu təsdiqlənmişdir. Keçilərdə endoparazitlərdən tənəffüs yolları və mədə-bağırsaq strongilyatları ilə intensiv, ibtidai bağırsaq parazitləri ilə qeyri-intensiv yoluxma müəyyən edildi. Təsərrüfat sahibinə babezioza və nematodozlara qarşı  müalicə sxemi və profilaktik tədbirlərə dair tövsiyələr verildi.