17-18 sentyabr 2024-cü il tarixində Azərbaycan Respublikası Kənd Təsərrüfatı Nazirliyi Baytarlıq Elmi-Tədqiqat İnstitutunda “Qlobal İqlim Dəyişkənliyinin heyvandarlığın inkişafına və  xəstəliklərin yayılmasına  təsiri” mövzusunda  beynəlxalq elmi-praktiki konfrans keçirilmişdir.

Baytarlıq Elmi-Tədqiqat İnstitutunun təşkilatçılığı ilə baş tutan konfransda xarici ölkələrdən və respublikamızdan alimlər, mütəxəssislər və heyvandarlıq təsərrüfatlarının baytar həkimləri iştirak etmişlər.

Konfransı giriş sözü ilə institutun direktoru Sialə Rüstəmova açaraq qonaqları və konfrans iştirakçılarını salamladı, dövlət himni səsləndi və şəhidlərimizin xatirəsi bir dəqiqəlik sükutla yad edildi.  Sialə xanım Rüstəmova “İqlim Dəyişmələri insanların və heyvanların həyat tərzinə göstərdiyi təsir”   mövzusunda  çıxış edərək iqlim dəyişmələri, onun müasir dünyamızdakı müxtəlif ölkələrin inkişaf xəttinə, qlobal iqtisadiyyatın təkamülünə, habelə iqlim dəyişikliklərinin   insan və heyvan sağlamlığına mənfi təsiri  barədə məlumat verdi.                

Konfransda Kənd Təsərrüfatı Nazirliyinin  “Heyvandarlığın təşkili və monitorinqi” şöbəsinin müdiri Bayandur Rzayev, ETN Zoologiya İnstitutunun direktoru Ələddin Eyvazov, Bakıda Rus evinin rəhbəri İrek Xayandaroviç Zinnurov, AQTA Heyvan sağlamlığı şöbəsinin müdiri Qalib Əbdüləliyev, Rusiya İnsan Resursları Akademiyasının Aqrar-Sənaye Kompleksi üzrə Kənd Təsərrüfatı Biotexnologiyaları kafedrasının müdiri, Baytarlıq kafedrasının professoru Kontsevaya Svetlana Yuriyevna, N.E.Bauman adına Kazan Dövlət Baytarlıq Akademiyasının radiologiya, terapiya və klinik diaqnostika kafedrasının professoru Əlizadə Həsənov, Heyvandarlıq Elmi-Tədqiqat İnstitutunun direktoru Mahir Hacıyev və digər qonaqlar iştirak etdilər. Kənd Təsərrüfatı Nazirliyi  Heyvandarlığın təşkili və monitorinqi şöbəsinin müdiri Bayandur Rzayev çıxış edərək bildirdi ki, qlobal iqlim dəyişikliyi heyvandarlıq sahəsinə də öz təsirini göstərməyə başlayıb. Bu təsirlərin azaldılması və uyğunlaşdırılması hazırda qarşımızda duran əsas vəzifələrdən biridir.                                          

Konfransın əsas məqsədi maraqlı tərəfləri bir araya toplayaraq iqlim dəyişikliklərinin kənd təsərrüfatının baytarlıq sahəsinə olan mənfi təsirlərinin azaldılmasının, iqlim dəyişmələri ilə mübarizə aparılmasının, onun təsirlərinin yumşaldılması üçün tədbirlər həyata keçirilməsinin və zəruri addımlar atılmasının gündəmdə olmasını zəruri hesab edilməsidir.  Bundan başqa, institututmuz ilə müxtəlif ölkələrin kənd təsərrüfatı sahəsində fəaliyyət göstərən müvafiq müəssisələr arasında əməkdaşlıq əlaqələrinin qurulması, mövcud əlaqələrin daha da gücləndirilməsi, birgə həyata keçirilə biləcək elmi tədqiqat layihələrin müzakirəsi də konfransın keçirilməsində prioritet məsələlərdən biri olmuşdur.

Konfransda S.K.Yuriyevna  “Heyvandarlıqda antibiotiklərin istifadəsini azaltmaq üçün proqramda bərpaedici dərman məhsullarının tətbiqi”, Ə.S.Həsənov "Ferorsel" preparatının hind toyuqlarının məhsuldarlığının keyfiyyətinə təsiri”, Baytarlıq Elmi-Tədqiqat İnstitutunun direktor müavini İ.M.Hacıyev  “Quşların Y sinif anticisimlərinin heyvanların infeksion xəstəliklərinə qarşı mübarizə sisteminə yeridilməsinin ekoloji və ekonomiki aspektləri” movzularında çıxış etdilər.  Daha sonra Rusiya alimlərindən biol.e.d., professor A.M.Yermakov, bayt.ü.f.d., professor T.V.Kurmakayeva və bayt.ü.f.d, dosent V.S.Bıçkovun təqdimatları nümayiş etdirildi.

18 sentyabr 2024-cü il tarixində də konfrans plenar iclaslarda öz işini davam etdirir.