16 sentyabr 2024-cü il tarixindən Lənkəran Dövlət Universitetinin “Baytarlıq” fakültəsinin “Baytarlıq təbabəti” ixtisası üzrə təhsil alan V kurs tələbələri Azərbaycan Respublikası Kənd Təsərrüfatı Nazirliyi Baytarlıq Elmi-Tədqiqat İnstitutunda kliniki - təcrübə dərslərinə başlayıb. 

Tələbələr İnstitutun bütün laboratoriyaları ilə yaxından tanış olublar. İlkin təcrübəyə tələbələr institutun "Quş xəstəlikləri şöbəsi" laboratoriyasından başlayıblar.    

Baytarlıq Elmi-Tədqiqat İnstitutunun Quş xəstəlikləri şöbəsinin müdiri, istehsalat təcrübəsinin rəhbəri aqrar.e.ü.f.d., dosent  Mirzəmməd Murtuz oğlu Həsənov tələbələrə  innovativ texnologiyaların tətbiqi olaraq fittobiotik təsirli bitkilərin müxtəlif infeksion xəstəliklərinə qarşı müalicə-profilaktika üsulları, quşlarda kliniki müayinələr, patanatomik yarmanın aparılmasına dair  elmi-praktiki təcrübə dərsləri keçib.

Tələbələrə hal-hazırda da İnstitutun  Arı və balıq xəstəlikləri, Baytarlıq Klinikası və heyvanların infeksion yoluxucu xəstəlikləri, Yoluxmayan daxili xəstəliklər, Parazitologiya, Quş xəstəlikləri, Virusologiya və  Baytarlıq preparatlarının istehsalı və nəzarəti şöbələrində 2024-2025-ci tədris illərinə uyğun olaraq kliniki-təcrübə dərslərinin keçirilməsinə davam edilir.